Listen Live

रेडियो आफ्नो एफ.एम.ले मनायो तेस्रो वार्षिक उत्सव ः उत्सवमा फलफूल, सम्मान पत्र र रेडियो वितरण

रेडियो आफ्नो एफ.एम.ले मनायो तेस्रो वार्षिक उत्सव ः उत्सवमा फलफूल, सम्मान पत्र र रेडियो वितरण
न्यूज डेस्क
२७ पुस, २०७५
रुकुम (पश्चिम) को चौरजहारीमा रहेको रेडियो आफ्नो एफ.एम. ९०.४ मेगाहर्जले  अस्पतालमा भर्ना भएका बिरामीहरुलाई फलफूल वितरण तथा मञ्चको कार्यव्रmममा आयोजना गरि आफ्नो वार्षिक उत्सव मनाएको छ । दोस्रो वर्ष पूरा गरि तेस्रो वर्ष प्रवेशको अवसरमा रेडियोले चौरजहारी अस्पतालमा भर्ना भएका बिरामीहरुलाई स्वास्थ्य लाभको कामना गर्दै फलफूल वितरण गरेको हो । चौरजहारी नगरपालिकाको सभाहलमा औपचारिक कार्यक्रमको आयोजना गरि शुभकामना आदान प्रदान तथा रेडियोलाई सहयोग गर्ने सहयोगी दाताहरुलाई सम्मान पनि गरिएको छ । 
शैक्षिक सत्र २०७४ मा चौरजहारी नगरपालिका भित्रका कक्षा ८ मा उत्कृष्ट अङ्क प्राप्त गर्ने चार जना विद्यार्थीलाई कापी,कमल, झोला लगायका सामग्री प्रदान गरेर सम्मान गरिएको छ । त्यसैगरि रेडियोलाई सबैभन्दा बढी विज्ञापन दिएर सहयोग गर्ने विज्ञापनदाता, सल्लाहकार, सहयोगी र रेडियोमा कार्यरत उत्कृष्ट कर्मचारी तथा पत्रकारहरुलाई पनि सम्मानपत्र प्रदान गरिएको छ । नियमित रेडियोमा फोन सम्पर्कमा आउने तथा रेडियो पारखी १६ जना श्रोताहरुलाई एक एक सेट रेडियो पनि प्रदान गरिएको छ । रेडियोलाई विशेष योगदान गर्ने व्यक्तित्वहरुलाई मायोको चिनो पनि प्रदान गरिएको छ ।
चौरजहारी नगरपालिकाको सभाहलमा आयोजित कार्यव्रmमलाई सम्बोधन गर्दै कार्यक्रमका प्रमुख अतिथि विशाल शर्माले रेडियोले जनतालाई  सहज रुपमा जनचेतना र सुसूचित  गराउने कुरामा महत्वपूर्ण भूमिका खेलेको उल्लेख गर्नुभयो । विभिन्न समस्या र कठिनाइका बाबजुद रेडियो स्थापना र कार्यक्रम उत्पादन तथा प्रसारण निकै प्रशंसनीय छ । शिक्षा, स्वास्थ्य, ज्ञानविज्ञान र मनोरञ्जको असल सारथि बनिरहेको छ प्रमुख अतिथि शर्माले भन्नुभयो यो सानो बालक छ,यसलाई जवान बनाउन हामी सबैको सहकार्य जरुरी छ । सत्यतथ्य सूचनाको सच्चा पहरेदार बनाउन रेडियोको  संवृद्धि र विकासलाई नगरपालिका कार्यले आवश्यक सहयोग गर्ने प्रतिवद्धता समेत व्यक्त गर्नुभयो ।
कार्यव्रmमका विशेष अतिथि मानव विकास तथा सामुदायिक सेवा रेडियो विभागका संयोजक विजय मानन्धरले रेडियोले स्थापनाको छोटो समयमै धेरै श्रोताको मन जित्न सफल भएकोमा खुसी व्यक्त गर्नुभयो । छोटो समयमा नै लोकप्रिय रेडियो स्टेशनका रुपमा विकसित भएको पाएँ उहाँले भन्नुभयो  यसको सम्भावना र भविश्य् उज्वल रहेको छ । रेडियो पहुँच विस्तार तथा थप गुणस्तर सुधारका लागि आफ्नोतर्फबाट पनि सक्दो सहयोग हुने प्रतिवद्धता व्यक्त गर्नुभयो । 
रेडियो सञ्चलक संस्था चौरजहारी सामुदायिक विकास केन्द्रका अध्यक्ष गोपाल रेग्मीको अध्यक्षता रहेको कार्यव्रmममा चौरजहारी नगरपालिका प्रमुख विशाल शर्माको प्रमुख आतिथ्यता रहेको थियो । मानव विकास तथा सामुदायिक सेवा (एच.डी.सी.एस.) का रेडियो विभाग संयोजक विजय मानन्धरको विशेष आतिथ्यता रहेको कार्यक्रममा जनप्रतिनिधिहरु, सरकारी तथा गैरसरकारी कार्यालयका प्रमुख एवम् प्रतिनिधि लगायतको सहभागीता रहेको थियो । कार्यक्रमको सञ्चालन शेरप्रसाद ढकालले सञ्चालन गर्नुभएको थियो ।  आफ्नो एफ.एम. आफ्नो आवाज भन्ने मुल नाराका साथ २०७३ पुस २७ गतेदेखि रेडियो आफ्नो एफ.एम. ९०.४ मेगाहर्ज सञ्चालनमा आएको छ ।

Latest News

Get Connected

© 2019 Radio Afno FM 90.4 MHz, All Rights Reserved Site by: SoftNEP